040 - Merdân-ı Hak bu dünyâda maksûdlara kalmadılar

Müstef'ilün Müstef'ilün Müstef'ilün Müstef'ilün 

 1 Merdân-ı Hak bu dünyâda maksûdlara kalmadılar

Mülk-i bekâ bulmış iken meyl-i fenâ kılmadılar

2 Ma'lûmdur ahî yol eri Mevlâ'yıçün n'itdükleri

Mihnet içinde her biri miskîn olup gülmediler

3 Müştâklarun oldur işi müdâm akar gözi yaşı

Mutlak Hak'ı seven kişi mâla câna kalmadılar

4 Meşhûr olup geldi yola Mansûr olan derdi bile

Mecnûn misâl oldı dile ma'şûkdan ayrılmadılar

5 Mahkûmısan sen bu işe münkir gibi dime n'işe

Müşkili yok başdan başa mü'min olan ölmediler

6 Mahlûk bilüsinden geçen Mi‘râc dapa oldur uçan

Ma'nî şarâbını içen mestlikden ayılmadılar

7 Menzil bu 'ışkdur Yûnus'a minnet şükür yüz bin Hak'a

Menzil bulan buldı mülke medhile ırılmadılar