095 - Anca zâr eyler kim şol bülbül eyler

Mefâ'îlün Mefâ'îlün Fe'ûlün

1 Anca zâr eyler kim şol bülbül eyler
Anı ol eylemez illâ gül eyler

2 Kaçan gülde görür dostun cemâlin
Çagırur kim beni deli şol eyler

3 Ne görür gülde yâ bî-çâre bülbül
Ki gülistâna karşu gulgul eyler

4 Ne gördi Leylâ'nun yüzinde Mecnûn
Akıdup göz yaşın âb u sel eyler

5 Ne göründi şu Ferhâd'un gözine
Kayalar kesüben dosta yol eyler

6 Ne göründi Şeh İbrâhîm gözine
Tâcını tahtını târumâr eyler

7 Kimin kâfir idüp kimin müselmân
Anı kimse itmez illâ ol eyler

8 Kimine derd virür asla inletmez
Kiminün dünyâda derdin bol eyler

9 Kimi baydur kimi yoksul dime kim
Eger baydur eger yoksul ol eyler

10 Kimine bir ‘abâ virmez kim giye
Kiminün atına atlas çûl eyler

11 Kimini dünyâda hayvân yaratur
Kimini kendine muhlis kul eyler

12 Kimin elin alur ‘Arş'a çıkarur
Kimin yire çalar kara kül eyler

13 Bî-çâre Yûnus'un altûn sözini
Câhile söylemen kızıl pûl eyler