096 - Dervîş olan kişiler deli olagan olur

1 Dervîş olan kişiler deli olagan olur
‘Işk neydügin bilmeyen ana gülegen olur

2 Gülme sakın sen ana eyü degildür sana
Kişi neyi gülerse başa gelegen olur

3 Âh bu ‘ışkun eseri her kime ugrarısa
Derdine sabretmeyen yolda kalagan olur

4 Bir kişi ‘âşık olsa ‘ışk deryâsına talsa
O deryânun içinde gevher bulagan olur

5 ‘Âşık lâ-mekân olur dünyâ terkini urur
Dünyâ terkin uranlar dîdâr göregen olur

6 Dervîş Yûnus sen dahı incitme dervîşleri
Dervîşlerün du‘âsı kabûl olagan olur