124 - Erenlerün yolları inceden inceyimiş

1 Erenlerün yolları inceden inceyimiş
Süleymân'a yol kesen şol bir karıncayımış

2 Ol karınca söyledi Süleymân'a yol didi
Ol karınca söyledügi cevâb alıncayımış

3 Götürmedi kimsene kimsenenün güçini
Güç götürdüm diyenler eli irinceyimiş

4 Kim kime ne dirise eger hayr u eger şer
Allah virür cezâsın gele yol inceyimiş

5 Gönlüm bana eydürdi seni severem dirdi
Gönlüm seni sevdügi dosta irinceyimiş

6 Gönlüm eydür varayın sana girü geleyin
Gönlüm uydugı bana dostı bulıncayımış

7 Yârenlerüm eydürler 'âşık melâmet gerek
Geldi benüm başuma ol söz yirinceyimiş

8 'Âşıkun gözi yaşı dün-gün dökülür durmaz
'Âşık kan agladugı ma'şûk sorıncayımış

9 Dört kitâbun ma'nîsin okıdum tahsîl kıldım
'Işka gelicek gördüm bir ulu heceyimiş

10 Ben dervîşem diyenler harâmı yimeyenler
Harâmun yinmedügi ele girinceyimiş

11 Eydürler fülân öldi mülkile mâlı kaldı
Ol mâlun irkildigi ıssı ölinceyimiş

12 İki kişi söyleşür Yûnus'ı görsem diyü
Biri eydür ben gördüm bir 'âşık kocayımış