256 - ‘İlmünde gark oluban ben beni bilimezin

1 ‘İlmünde gark oluban ben beni bilimezin
Dilile söyleyüben sıfatun irimezin

2 Sıfatun gelmez dile kandalıgun kim bile
Sun‘unı dimeklige ben lâyık olamazın

3 Hem evvelsin hem âhir kamu yirlerde zâhir
Hîç makâm yokdur sensüz ben niçün göremezin

4 Görmedin delü oldum yanıldum günâh kıldum
Ussum ‘aklum aldurdum esridüm ayılmazın

5 Çünki beni esritdün cân u gönül iletdün
Ayırma beni senden bulışdum yad olmazın

6 Bana cânı sen virdün ‘Azrâîl'e bildürdün
Senden artuk kimseye emânet viremezin

7 İy Yûnus'ı yaradan hicâb götür aradan
Sâdıkam yolunda ben yalan da'vî kılmazın