259 - Dost yüzini göricegez niçe karâr kılsun bu cân

Müstef‘ilün Müstef‘ilün Müstef‘ilün Müstef‘ilün

1 Dost yüzini göricegez niçe karâr kılsun bu cân
Yagmâya virür ol demde yüz bin zâhid dîn ü îmân

2 Ta‘na urman ‘âşıklara her ne hâle dönerise
Fermân olımaz kendüye müşâhadeye gark olan

3 Cân u gönül fehm ü ‘akıl ‘ışk mevcine gark olıcak
Pes niçe ansun ol kişi yazug u müzd assı-ziyân

4 Cânında gözi yok kişi görmeyiser dost yüzini
Gözsüz niçe fehm eylesün ne renkdedür işbu cihân

5 Yüz bin melik ü selâtîn dost yüzini göricegiz
Terk eyleye tahtını vü ‘izzet ü leşker hânumân

6 ‘Âşık niçe harâbısa velâyeti arta durur
Anuniçün ki dâimâ vîrândadur genc-i nihân

7 ‘Ayne'l-yakîn gören kişi ırmaz gözin dost yüzinden
Niçe görebilsün anı bu sevüden taşra turan

8 Yûnus'a bu ‘ışk kızgını komaz dilini tutmaga
‘Âşıkla ma'şûk râzını dürüst diyemeye lisân