261 - Ol cân kaçan öliser sen ana cân olasın

1 Ol cân kaçan öliser sen ana cân olasın
Ölmiş gönül dirile anda ki sen olasın

2 Ölmeklik dirlik ola ölümsüz dirlik bula
Başlu gönül onula merhemi sen olasın

3 Sen oldugun gönüller her dem cânın yiniler
Bunlardur ölmeyenler hâkimi sen olasın

4 Sen oldugun makâmda ehl-i dâd olur anda
Güç olmaz ol dîvânda sultânı sen olasın

5 Cân bedenden uçıcak menzilinden göçicek
Ol cihâna geçicek göze ‘iyân olasın

6 Tozını yil almaya bir zerre ırılmaya
‘Âşık cânı ölmeye ma'şûkı sen olasın

7 Yûnus sen ‘âşıkısan ‘ışka muvafıkısan
Korkma ulaşıgısan ne olursan olasın