264 - Dîn ü millet kodurdı ol benüm gönlüm alan

1 Dîn ü millet kodurdı ol benüm gönlüm alan
Anı gören kişiye ne gönül kalur ne cân

2 Tuymayanlar hâlümi dînin kodı dir bana
Neyile dîn beslesin cânsuz gönülsüz kalan

3 Sûretümde varlıgum cânıla gönülidi
Kodurdı kamusını bana ‘ışk bagışlayan

4 ‘Işkun serhengi beni komaz hîç bir nesneye
Ne İslâm'da ne dînde anılmaz küfr ü imân

5 Şart u farz olmaz anda cânı ‘ışkda kalanda
Cevâb sözi dil söyler niçe bilsün bu lisân

6 ‘Işka mesel baglanmaz ‘ışk işi hisâb olmaz
Dostlık ticâretinde anılmaz assı-ziyân

7 Beni benlikden kodı varlık defterin yudı
Havf u recâ göstermez hayr u şer elden koyan

8 Elden iş bırakdurdı niteliksüz bakdurdı
Bizüm ahvâlümüzde anılmaz nâmla nişân

9 Sorman Yûnus'dan haber dost kandasa anda var
Yüz bin gevherden fârig ‘ışk denizine talan