268 - Şöyle hayrân eyle beni ‘ışkun odına yanayın

1 Şöyle hayrân eyle beni ‘ışkun odına yanayın
Her kancaru bakarısam gördügüm seni sanayın

2 Beni okıdı sultânum uş gönüldi gider cânum
Elden bırakdı benligi bunda niçe egleneyin

3 Senün kokun tuydı cânum terkin urdum bu cihânun
‘Aceb kandadur mekânun ya ben kanda isteyeyin

4 Dört mezhebün ‘âşıkıyam yidi mezheb geçdi cânum
Kogıl beni söyletmegil bu yollarda uyanayın

5 Yidi Tamu didükleri katlanmaya bir âhuma
Sekiz uçmak eglemeye bunda niye egleneyin

6 Sekiz Uçmak ‘arz olursa yitmiş bin Hûrî gelürse
Aldamaya bu cânumı bunda nite aldanayın

7 Dilde söylenür haberün hergiz bulunmaz eserün
Götür yüzünden perdeyi dîdâruna göyüneyin

8 ‘İlm-i hikmet okıyanlar ‘ışkdan fakîr durur bunlar
Mansûr oldum asun beni hep dillerde söyleneyin

9 Yûnus dimedi bu sözi câna toldı dost âvâzı
Kördür münâfıkun gözi ya ben niçe göstereyin