309 - Var derdile yan yüri dermâna irişince

1 Var derdile yan yüri dermâna irişince
‘Işkıla kullık eyle sultâna irişince

2 Sular gibi seyreyle bir yirde karâr itme
Alçaklara ak yüri ‘ummâna irişince

3 Gâyet hor u hakîr ol başda Halîl olasın
İsmâ'îl gibi sen de kurbâna irişince

4 Eyyûb'layın sabr eyle Ya‘kûb'layın çok agla
Yûsuf-sıfat sen dahı Ken‘ân'a irişince

5 Yûnus sen bu gevheri harceyleme nâdâna
Bu yolda neler çekdün ol kâna irişince