353 - ‘Işk bâzirgânı ser-mâye cânı

1 ‘Işk bâzirgânı ser-mâye cânı
Bahadur gördüm câna kıyanı

2 Zihî bahadur cân terkin urur
Kılıç mı keser himmet giyeni

3 Kamusın bir gör kemterin er gör
Alçak görmegil palâs giyeni

4 Tîz çıkarurlar fevka'l-'ulâya
Bil ‘Îsâ gibi dünya koyanı

5 Tîz indürürler tahte's-serâya
Şol Kârûn gibi dünyâ kovanı

6 'Âşık olanun nişânı vardur
Melâmet olur bellü beyânı

7 ‘İlm ü ‘amele olmagıl magrûr
Hak kabûl itdi kefen soyanı

8 Kodı atlası geydi palâsı
İbrâhîm Edhem sırdan duyanı

9 Çün Mansûr gördi ol benem didi
Oda yakdılar işitdün anı

10 Oda yandurtdun külin savurtdun
Eyle mi gerek seni seveni

11 Zinhâr iy Yûnus gördüm dimegil
Dâra çekerler gördüm diyeni