401 - Müslümânlar kim görmişdür ‘âşık tevbe itdügini

1 Müslümânlar kim görmişdür 'âşık tevbe itdügini
Yâ kim işitdi denize od düşüben tütdügini

2 Şâhum senün 'ışkun odı düşdi gönül deryâsına
'Aceblemen kaynayuban ma'rifetler bitdügini

3 Yüz bin 'Îsâ'yilen Mûsâ 'ışkıla ser-gerdân gezer
'Aceblemen beni dahı 'ışk nihengi yutdugını

4 Yüzgeçlik ögrenimeyen kul girmesün bu denize
'Işk denizi derin olur 'aceblemen batdugını

5 Sarrâflıgı ögrenmeyen bu gevheri boncuk sanur
Varur virür yok nesneye bilmez neye satdugını

6 Her kim ol dost dîdârını bunda 'ıyân görmezise
Yarın ol ser-gerdân geze hîç bilmeye n'itdügini

7 Uşda miskîn Yûnus eydür Tapdug'umuz dost yüzidür
İnanmayan işbu söze eydebilsin eytdügini