405 - Yok yire geçürdüm güni, Âh n'ideyüm ‘ömrüm seni

Müstef'ilün Müstef'ilün

1 Yok yire geçürdüm güni
Âh n'ideyüm 'ömrüm seni
Senünle olmadum ganî
Âh n'ideyüm 'ömrüm seni

2 Geldüm ü geçdüm bilmedüm
Aglayup gussa yimedüm
Senden ayrılam dimedüm
Âh n'ideyüm 'ömrüm seni

3 Seni bana yâr sanurdum
Bana vefâdâr sanurdum
Aygâr imişsin bilmedüm
Âh n'ideyüm 'ömrüm seni

4 Kanı sana güvendügüm
Sevinüben özendügüm
Küllî kalur kazandugum
Âh n'ideyüm 'ömrüm seni

5 Gidüp gine gelmeyiser
Gelüp beni bulmayısar
Bu begligi sürmeyiser
Âh n'ideyüm 'ömrüm seni

6 Çün beni koyup gidesin
Varup sinleye giresin
Anda gelüp söyleyesin
Âh n'ideyüm 'ömrüm seni

7 Hayrum şerüm yazılısar
'Ömrüm ipi üziliser
Sûret benden bozulısar
Âh n'ideyüm 'ömrüm seni

8 Miskîn Yûnus gidisersin
'Aceb sefer idisersin
Hasretile kalısarsın
Âh n'ideyüm 'ömrüm seni